India leh Canada-in defence leh space sector-ah thawh dun remti

Prime minister Narendra Modi leh Canada prime minister Mark Carney-te chu Pathianni khan G20 summit, Africa-a neih karlakah inkawmin defence leh space sector huanga thuk zawka thawh dun an remti. Hei bakah investment, techology leh energy-a thawh dunna tihhmasawn an remti bawk. PM Modi hi Pathianni vek khan India panin a rawn haw nghal a ni.

Summit-a hruaitu pahnih inkawmna hi tun hnaia an in hmuh vawi hnihna a ni a, kumin June khan Kanaski, Canada-a G7 summit-ah an lo inkawm tawh bawk. Modi chuan ram pahnihte'n sumdawnna leh investment huanga thawh dunna tihchak an tum thu sawiin; kum 2024-a ram pahnih insumdawn tawnna hlut zawng USD tld 30 chu kum 2030 ah USD tld 50 kai tir hman an tum tih a sawi.

Ministry of External Affairs chuan ram pahnih hruaitute chuan thawh dunna tihchakna turin Australia-Canada-India Technology and Innovation (ACITI) Partnership chu hman an duh tih a tarlang. Hemi kaltlang hian technologies, nuclear energy, supply chain zau zawk leh AI-a ram pathumte thawh hona tihchak beisei a ni.

India leh Canada inkar hian Canada prime minister hlui Justin Trudeau ban hnuah ṭhat lam a pan zel a, ram pahnih PM-te G20 summit-a an inkawm hma pawhin hruaitu hrang hrangte chuan thawh dunna tihhmasawnna turin an lo inbe tawh a ni. PM Modi hian PM Carney chu India tlawh tur hian a sawm zui nghal bawk.