Putin-a'n India a tlawh hunah thawh dunna tifel dawn

India leh Russia thawh dunna thar tur hrang hrang ruahman chu Russia president Vladimir Putin-a'n thla thara India a rawn tlawh hunah tihfel tum a ni. Thawh dunna tihfel a nih theih nan external affairs minister S. Jaishankar chuan Thawhṭanni khan Moscow-ah Russia foreign minister Sergery Lavrov pawh a lo hmu tawh bawk.

Russia president Putin hi December 5-a India-Russia annual summit neih turah a rawn tel beisei a ni a, prime minister Narendra Modi nen an inkawm ang. Summit neih turah hian ram pahnih inkar thawh dunna thar bakah thawh dun tawhna kal mek chu tihhmasawn dan turte ngaihtuah tum a ni. Modi leh Putin hian ram pahnih inkara "Special and Privileged Strategic Partnership" tihzauh chunchang an sawi rin a ni bawk.

India leh Russia hian kumtin an thawh dunna neihte thlirleta inbiakna an nei ṭhin. Nikum khan PM Modi chu nnual summit vawi 22 hmangin Russia-ah a kal a, kuminah hian India-ah inbiakna hi neih a ni dawn thung.

Russia-a cham mek, Jaishankar chuan Ukraine leh Russia inkar buaina chingfela remna leh muanna thlen chu India-in a thlawp reng tih sawiin, ram pahnih inkar buaina a rang lama chinfel chu an duhthusam a nih thu a sawi. Tun hnaiah India leh Russia inlaichinna hi U.S. chhiah tihpun vangin a nghet chho zawk niin a lang a ni.