Delhi-a bomb tihpuahna car khalhtu in ṭhiah sak

Delhi-a Red Fort bula Thawhṭannia bomb tihpuahna car khalhtu, Dr. Umar Nabi chenna in Pulwama, Jammu and Kashmir-a mi chu nimin khan ṭhiahsak a ni. In ṭhiah hna hi security force te'n thawkin, Ningani zan aṭang khan an ṭhiat ṭan a, nimin kha zawhfel a ni tih official chuan an tarlang. Car-a bomb tihpuah vang hian mi 13 an thih bakah mi dang 20 chuang an hliam bawk.

Security force-te'n in an ṭhiahsak, Dr. Nabi hian bomb phurhna hyundai i20 car khalhin, a nihna dik tak hi DNA sample lak aṭanga finfiah a ni. Chhuichianna aṭanga a landanin Dr. Nabi hian tun hnai kum hnih liamta aṭang khan social media-a radical messaging group hrang hrang a zawm hnuah hel pawl lam hi a zawm ta nia hriat a ni.

Thil thleng chungchang zirchiang hian agency hrang hrangin Kashmir, Haryana, Delhi, leh Uttar Pradesh-ahte hma an la mek. Chhuichianna aṭangin mi dang pahnih, medical college professor leh zirlai, J&K mi leh sa man belh an ni leh bawk. Man tharte hi Ningani khan UP-ah hren nghal an ni a, sorkar laipui pawhin Al-Falah University-a forensic audit nei tura thupek a tichhuak bawk. Bomb puak kaihhnawiha inhnamhnawih eng emaw zat chu he university-a thawkte an ni.