Accreditation dik lo tarlan vangin NAAC in Al-Falah University show-cause notice pe

National Assessment and Accreditation Council (NAAC) chuan Faridabad, Haryana-a Al-Falah University chu an website-a accreditation chungchang dik lo taka an tarlan avangin show-cause notice a pe. He university hi Delhi-a bomb puak kaihhnawihah chhui chian mek a ni bawk.

NAAC chuan Al-Fatah University hi accreditation an pek loh bakah, NAAC-ah dilna engmah pawh a theh lut lo tih a sawi. Al-Falah University hi Al-Falah Charitable Trust enkawl niin, an campus-ah college pathum an awm. Heng college pathumte hi an website-ah Al Falah School of Engineering and Technology (since 1997, Graded A by NAAC), Brown Hill College of Engineering and Technology (since 2008), leh Al-Falah School of Education and Training (since 2006, Graded A by NAAC) tiin an tarlang a ni. Mahse, hei hi a dik lo tih NAAC show-cause notice-ah tarlan a ni a, accreditation an tarlan dan chu mipui, a bikin nu leh pa, zirlai leh stakeholder-te bumna a ni, a ti.

University website-a NAAC accredition an ziah lan chungchang chu sawifiah tur leh, paihbo nghal turin university chu hriattir a ni. Website baka hmun danga a pholanna pawh paih turin a ti a ni.

Thawhṭanni zan khan Delhi-a Red Fort bulah bomb puahna, i20 car khalhtu, Dr Umar Mohammad kha he university-a thawk a ni a, pawikhawihna thleng kaihhnawiha man zingah Al-Falah University nena inzawmna nei, doctor pathum an tel bawk. Hei vang hian sorkar chuan Enforcement Directorate (ED) hnenah university-in fund a hmuh dan chu chhui chiang turin thupek a tichhuak tawh bawk.