WBengal-a Aadhaar card holder nuai 34 an thi tawh : UIDAI

Unique Identification Authority of India (UIDAI) chuan West Bengal chief electoral officer (CEO), Manoj Kumar Agarwal nena meeting an neihah, kum 2009 January thla aṭanga hman ṭan, Aadhaar card pek chhuah hnuah West Bengal-ah Aadhaar card holder mi nuai 34 vel an thi tawh tih an sawi.

Electoral roll ennawnna, Special Intensive Revision (SIR) neih mek karah Election Commission of India (ECI) chuan state tina CEAO-te chu voter data endiknaah UIDAI official-te thawhpui turin a ti a ni. Hemi hnu hian CEO Agarwal pawhin UIDAI official-te hi meeting a neihpui a ni.

CEO office chuan SIR kalpui meknaah voter dik lo, voter list-a thi tawh leh an state-a awm tawh lo bakah, hming lem chuang tih chungchangah complaint an dawng tih a sawi. UIDAI data aṭang hian roll ennawnnaah mitthi tawh list paih pawh awlsam zawkin an kalpui thei dawn niin a tarlang.

Poll official-te chuan Aadhaar hi bank account nena thlunzawm a nih hlawm avangin voter finfiahna atan bank aṭangin information pawh an la tel tih an sawi. Kum eng emaw chen an account-a KYC update tawh lo a, thi tawh nia hriat voter roll-a an hming la chuangte chu hriat chhuah a awlsam phah dawn a ni, an ti.

West Bengal-a SIR kalpui meknaah, Nilaini zan dar 8 thleng khan Enumeration Forms vbc 6.98 sem chhuah a ni tawh a, hei hi sem chhuah tur awm zat aṭanga 91.19% a tling pha a ni.