Faridabad-a J&K doctor inah ralthuam man a ni

Jammu and Kashmir police te'n Intelligence Bureau (IB)leh Faridabad Police aṭanga an thudawn bawhzua Delhi-NCR bul Faridabad, Haryana-a beihpui an thlak naah doctor chenna in aṭangin bomb siamna hmanrua bakah silai leh a mu an hmuchhuak. Heng ralthuam siamna leh a kaihhnawih neitu nia hriat, Kashmir doctor Adil Ahmad Rather an man tel bawk a ni.

Doctor man hian Pakistan-a awm, Jaish-E-Mohammed leh Ansar Ghazwat-ul-Hind, al-qaida nena inthlunzawm pawl a thawhpui ngei nia hriat a ni bawk. A chenna in aṭang hian bomb siamna hmanrua kg 2,900 bakah ammonium nitrate kg 350 leh timer an man a; silai leh a mu eng emaw zat an man tel bawk. Ahmad Rather hi Al-Falah Hospital Faridabad, Haryana-a medical professional niin Anantnag Government Medical College-a doctor thawk lai a ni bawk.

Police-te hian Faridabad bakah J&K huam chhung hmun hrang hrang - Srinagar, Anantnag, Ganderbal, leh Shopian-ah pawh beihpui thlakin, tun hnaiah firfiak pawl chetna kaihhnawih thil eng emaw zat man chhuah a lo ni tawh a ni. Doctor man an nih hnu hian rinhlelh thilah mi dang panga man an ni tawh bawk a ni.