'Vande Mataram' chungchangah thupha chawi turin PM phut

Congress party chuan prime minister Narendra Modi chu national song, 'Vande Mataram' chungchanga a sawi danah India ram dintu pawimawh takte zah lohna leh India ram chanchin dik lo taka sawiah an puh a, a thusawi dan avangin thupha chawi turin an phut.

PM Modi hian Congress party chuan kum 1937 khan 'Vande Mataram'-a a chang pawimawhte an paih niin a puh. A chang pawimawh paih vang hian he hla hi a nih dan tur ang a nih loh phah a, ram inṭhendarhna tur chi a tuh phah a ni, tiin a sawi.

Congress party chuan PM thusawi hi an helh hle a, party general secretary Jairam Ramesh chuan Tagore-a biography-a phek ṭhenkhat, Vande Mataram hlaa a chang hmasa pahnih chauh chu national song-a hman atana a duh thu a ziaknate a tilang a ni. Hetichunga hetiang zawnga PM Modi-a'n thu a sawi chu demin, thupha a chawi ngei tur a ni, a ti.