SC-in khawlai ui chungchangah hearing nei dawn

Supreme Court chuan August 22-a khawlai ui khuahkhirh tura thupek a tihchhuah chungchangah vawiin hian hearing a nei dawn a, state leh Union Territory-a chief secretary(CS) zawng zawngte tel vek turin a hriattir.

SC hian thupek a tihchhuah chu state leh Union Territory tam zawkin an zawm ngei a ni tih lantirna, compliance affidavit an thehluh loh vangin hearing hi neih a ni dawn niin a tarlang. West Bengal, Telangana leh Municipal Corporation of Delhi (MCD) te erawh compliance affidavit an theh luh avangin ngaihhnathiam an ni thung.

Court sang ber hian khawlai ui khuahkhirh chungchanga October 27-a hearing a neih ṭum khan state leh UT tin CS-te chu compliance affidavit an theh luh loh chhan chu vawiina hearing neihah hian sawifiah turin a lo titawh a ni. August 22 khan State leh UT te chu Animal Birth Control (ABC) Rule an kalpui dan chungchangah a lo zawt tawh bawk.

Hearing hi judge pathum, justice Vikram Nath, Sandeep Mehta leh N.V. Anjaria-te awmna special bench hian an nei dawn a ni. Solicitor General Tushar Mehta chuan bench hnenah hian CS te chu virtual-a an tel phalsak turin ngen mah se court chuan thupek zah lohna a ni tiin a lo hnawlsak thung a; August 22-a thupek chhuah tawh zawm loh avang hian court a lawm loh thu a tarlang zui bawk a ni.

SC chuan a thupek tihchhuah chu state leh UT-in an zawm loh avangin India chu ram dang lakah a landan a hnufual phah a, ram chhungah harsatna a thlen zui reng phah niin a tarlang. Bench chuan ram chhunga ang khata ABC Rule hman a nih theih nan state leh UT-te chu hma laa thlithlai zui turin a ti.