PM-in Chhattisgarh-ah Assembly building hawng dawn

Prime minister Narendra Modi chuan vawiin hian Chhattisgarh-a Legislative Assembly building thar, Nayapur ami a hawng dawn. Assembly building thar hi Chhattisgarh state puitling a nih cham vawi 25-na pualin hawn a ni dawn a, governor, chief minister, leh union minister eng emaw zatin an telpui dawn bawk.

Chhattisgarh hi kum 2000, November 1 khan India state 26-na ni turin state-ah hlankai a ni a, kum 2000, December 14 khan legislative assembly session hmasa ber an nei. Assembly building nghet an la nei lo chhunzawm reng a, Raipur-a Rajkumar College chu hman lailawk a ni.

Assembly complex thar hi Section 19, Naya Raipur-ah sak niin ram acres 52 a zau a awh a, Rs vbc 324 seng a sak a ni. Bulding sak dan phung pawh hi India rama legislative assembly tunlai leh changkang ber ni phain, Chhattisgarhi hnam nunphung leh tunlai architect thiamna pholang thei tur bera duan a ni bawk.

Building hi hlawm lian tak takah ṭhen a ni a Assembly House, Assembly Secretariat, leh Central Hall te siam niin; eco-friendly system thei ber turin an duang a, solar panels leh ruahtui dahkhawlna thlengin siam a ni bawk. Lirthei 700 bawr dah theih turin parking area zau tak a awm bawk a ni.