Delhi-a cloudseeding kalpui titawp rih

India khawpui, Delhi-ah Diwali bawra halmawi hal nasat vang leh, state ṭhenawm Haryana leh Rajasthan aṭanga loneitute lo hal khu vanga boruak bawlhlawh a nasat avanga Thawhlehni aṭanga cloudseeding, ruah sur chawptir tuma an hmalakna chu nimin khan tihtawp rih a ni. Cloudseeding kalpui hi Indian Institute of Technology (IIT) Kanpur team te'n buaipuiin, team lam hian chhum hnawn ṭhat tawk loh vanga tihtawp a nih thu an sawi.

Delhi huam chhunga cloudseeding kalpui a nih hnu hian chhumah boruak hnawng tur ang zat a awm loh avangin ruahsur tur hi a sur zui thei lo a ni. IIT Kanpur team chuan hmalakna hlawhtling tur chuan van boruak awmdanah nasa taka a innghah thu an sawi a, chhum hnawn lam hi 15 to 20% a nih a ngai niin an tarlang bawk.

Cloudseeding hi khaw awmdan tihdanglamna hmanrua niin, a tlangpuiin hmun thlan bika ruahsur tirna atana kalpui ṭhin a ni. Seeding tihna atan hian silver ioddie emaw chloride emaw chu chhumah tihchhuah ṭhin niin hei hian ruah a sur tir theih phah a ni. Delhi environment minister Manjinder Singh Sirsa chuan enchhin vawi hnih chu hlawhtling lo mah se, ṭum sarih dang kalpui leh tura ruahman a ni, a ti.