India leh China sipai hotuten Chushul-Moldo ramriah meeting nei

India leh China sipai hotute chuan kar liam ta kartawpah khan Chushul-Moldo border meeting point-ah Corps Commander-level meeting an nei. Inbiakna hi August 19, 2025-a '24th round of Special Representative' neih hnua general-level a inbiakna neih vawi khatna a ni a, boruak ṭha tak hnuaiah inpawh taka hun hman a nih thu ministry of external affairs chuan a tarlang.

Inbiakna kaltlang hian ram pahnih sipai hotute hian Line of Actual Control (LAC) huam chhung lei lama inremna an lo neih tawh kenkawh chhunzawm an remti. Hei bakah hian ramri thlang lam huam chhunga sensitive area-a buaina awm ṭhin tihtlem pawh remtih a ni a, sipai leh ram hruaitu aṭanga inbiakna neih chhunzawm ṭhin pawh kalpui zui an remti bawk.

India leh China sipaite kum 2020 June-a Galwan Valley-a an inbeih kha kum 40 chhunga ram pahnihte ramria an inbeih nasat ber ṭum niin, sipai eng emaw zatin nunna an chan bawk. Hei hian ram pahnihten inremna neih tawhte nasa takin a tichhia a, thawh dunna hrang hrang pawh tihtawp a ni zui bawk. Ram pahnih inkar buaina hian kum 2024-a BRICS summit neih ṭuma prime minister Narendra Modi leh president Xi Jinping te inbiak hnuah ṭhat lam a pan leh thei ta chauh a ni.

Corps Commander-level inbiaknaah hian ram pahnihte hian '22nd round of Corps Commander Level meeting' kum 2024-a neih hmasawn dan leh kalpui dan thlirletna an nei nghal a, hmalaknate kalpui ṭhat a nih thu an tarlang.