India Post-in thil thawn thlen ran theihna tur service hmang dawn

Union communications minister Jyotiraditya Scindia chuan nimin khan India Post chuan mail leh parcel thawn rang taka thlen tir thei tur, guarantee-based service darkar 24 leh 48 chhunga thawn thleng thei tur an hmang thuai dawn tih a sawi. Minister chuan heng thil thawn thlen tir zung zung thei turte hi January hnu lamah hman ṭan tura ruahman a nih thu a sawi.

Jyotiraditya Scindia chuan," Product thar kan tichhuak dawn a, hemi hmang hian speed post service chuan darkar 24 chhungin thil thawnte a thawnna hmun an thlen tir thei tawh dawn a ni. Hetiang chiah hian speed post vekin darkar 48 chhunga thil thawnte thlen theihna tur pawh a tel bawk," a ti. Hei bakah hian thil thawn tuka thlen tir theihna tur leh ni thum emaw ni nga emaw chhunga thlen theihna pawh hman a nih tur thu a tarlang bawk.

Minister chuan sorkarin India Post chu kum 2029-ah 'cost centre' aṭangin 'profit centre' hlawkna tel theihna hmunah siam thar a tum thu a sawi a, hemi hlawhtlina tur hian hmalakna a kalpui mek a ni, tih a sawi.