India- Brazil-in PTA huang zauh an remti

India leh Brazil chuan Mercosur block hnuaia insumdawn tawnna atana inrema an siam, Preferential Trade Agreement (PTA) huang zauh an remti.

India tlawha rawn zin, Brazil vice president Geraldo Alckmin leh commerce and industry minister Piyush Goyal te chuan hemi chungchang hi an sawi dun a ni. Mercosur hi trading bloc niin Latin America-a ram pali - Brazil, Argentina, Uruguay leh Paraguay te intelkhawm a ni. India-Mercosur PTA siam hi kum 2009, June khan hman ṭan tawh niin inremna hnuaiah hian product hrang hrang 450 chauh a huam a, mahse, hei aia huam zau zawka siam hi an tum a ni.

Commerce ministry chuan India leh Mercosur insumdawn tawnna tura inbiakna neih chu remtih a nih thu a tarlang a, huang zauhna tur hian PTA hnuaiah Joint Administration Committee siama meeting neih an remti bawk. Sumdawn tawnna tihhlawhtlin a nih theihna tur hian kum khat chhung ngeia inbiakna neiha tihfel an remti.

Brazil hi Latin America leh Caribbean huam chhunga India-in sumdawnna a neih pui lian ber an ni a, kum 2024-25 chhung khan ram pahnih insumdawn tawnna hi USD tld 12.19 a tling pha. Sumdawn tawnna tihzauhna tur hian hmachhawp thar siamin kum nga lo awm leh tur atan sumdawn tawnna chu USD tld 20 kai hman tir an tum a ni.