2030 Commonwealth Games thleng turin Ahmedabad rawt

Executive Board of Commonwealth Sport chuan Nilaini khan kum 2030-a 'Centenary Commonwealth Games' neih tur thleng turin Ahmedabad a rawt a, November 26-a Glasgow-a Commonwealth Sport General Assembly neihah thutlukna siam a ni ang. Games thleng tur hian Nigeria khawpui, Abuja rawtna pawh theh luh a ni bawk.

Games thleng tura Ahmedabad rawtna hi pawm a nih chuan kum 20 hnua India-in Commonwealth Games a thlen leh hmasak ber tur a ni dawn. India-in kum 2036-a Olympic neih tur, Ahmedabad-a thlen a beiseinaah pawh kawng a hawn phah thei beisei a ni bawk.

Commonwealth Sport's Evaluation Committee chuan inelna thlenna tura rawt khawpuite chu criteria hrang hrang - technical delivery, athlete experience, infrastructure, inrelbawlna, leh commonwealth sport value hmangtein an endik dawn a ni.

India hian Games a thlen hnuhnung ber kha kum 2010 kha niin , kum 2030-ah pawh hian a thleng thei ngei dawn niin Indian Olympic Association President P T Usha chuan a sawi. Usha chuan inelna thlengtu nihna hian world-class sports-a India theihna neih zia leh India hmathlir "Viksit Bharat 2047" thlen tirna atana kawng pawimawh a nih thu a sawi.