India-in carbon tihchhuah tlemna tur kaihhruaina tichhuak

Sorkar laipui chuan ram chhunga carbon-heavy industry hrang hrangte'n boruak bawlhhlawh an tihchhuah ṭhin tihtlemna tur kaihhruaina, 'Greenhouse Gases Emission Intensity Target Rules, 2025' a tichhuak.

Kaihhruaina thar tihchhuah hian industry hrang hrang 282 a huam a, heng industry-te hi aluminium, cement, pulp, leh paper, leh chlor-alkali sector-te an ni. Kum 2023-24 baseline level aṭanga teha greenhouse gas an tihchhuah milin tehna hi siam a ni. Hriattirna tihchhuah hian industry-te greenhouse gas an tihchhuah zat tur siam chu 2025-26 aṭanga zawm ṭanin 2026-27 thleng a huam ang.

Hmalakna hi Energy Conservation (Amendment) Act, 2022-in sorkar laipuia carbon market enkawl dan tura thuneihna a pek anga kalpui niin, industry boruak bawlhhlawh tichhuak tlemte chuan 'tradeable carbon credit certificates' an dawng thei dawn a, a tichhuak tam erawhin pawisa an chawi thung ang. An chawi tur zat hi Bureau of Energy Efficiency (BEE)-in an ngaihtuah dawn a ni.

Boruak bawlhhlawh tihchhuah tlemna tur atan hian cement sector tana kum hnih chhunga bituk chu 3.4% a ni a, aluminium tan 5.8%, chlor-akali 7.5% leh pulp and paper tan 7.1% bituk a ni bawk. Sorkar chuan Indian exporter-te chu European Union-in Carbon Border Adjustment Mechanism (CBAM) a duan mila insiam rem turin a ngen nghal bawk.