MHA-in NGO-tan FCRA chungchang hriattirna tichhuak

Union ministry of home affairs (MHA) chuan Thawhlehni khan non-governmental organisations (NGO) tana hriattirna pawimawh tichhuakin, ram dang aṭanga sum hmanga puihna dawn theihna Foreign Contribution (Regulation) Act (FCRA) hnuaia inziah luhna, registration chu a thih hma thla li la awmah tinung ṭhin turin a hriattir. FCRA hi NGO-te tana tih ngei ngei tur niin kum nga danah tihthar zel a ngai a ni.

FCRA kalphung pangngaiah hian registration a thih hma thla rukah tihthar ngei ngei a ngai a, ministry-in hriattirna a tihchhuah chhan pawh hi, tihthar tura dilnate mumal leh uluk zawka zirchianna hun a awm theihna tura tih a nih vang niin an tarlang. NGO te chuan FCRA thih hnua an tihthar hian tihtharna pawm a nih hma zawng chu rampawn aṭang sum hmanga puihnate an dawn theih loh phah ṭhin bawk.

Hriattirna tihchhuah hi NGO zawng zawngte chu zawm tura ngen an ni a, harsatna leh buaina nasa zawk an tawh phah lohna tura lo inhmakhua turin a ti bawk. Tarlan danin Thawhlehni thleng khan ram chhungah pawl hrang hrang leh NGO, FCRA hnuaia inziak lut hi 16,192 an awm mek a ni.