Congress-in Ladakh nawrhnaa thihna thleng chhui phut

Congress party chuan nimin khan Ladakh-a nawrh huaihawtnaa thihna thleng chungchang chu rang taka chhui chiang turin sorkar laipui an phut tih an sawi.

Ladakh-ah hian Nilaini khan state-a hlankai leh sixth schedule status pek phutin nawrh huaihawt a ni a, buaina chhuakin ṭhalai paliin an thih phah a ni. Thite hi police-in buaina bengdaih tuma silai an hmehpuah tuara thi niin an sawi.

Ladakh-a minister hlui Nawang Rigzin Jora chuan Ladakh Lt Governor hnenah hian lehkha thawnin, police silai hmehpuah vanga ṭhalai pali thihna chu chhui chiang turin a ngen. Jora chuan thihna thleng chu pawi a tih thu leh thil thleng vang hian sorkar a dem takzet thute a tarlang tel a, dawhthei taka buaina chhuak bengdaih tum a ni lo chu a dem thu a sawi bawk.

Congress party general secretary Jairam Ramesh chuan kum ruk liam taa Ladakh huam chhung UT-a dah a nih hnu khan mipui an lungawi lo hle a, hei hian an rilruah huatna nasa tak a tuh bawk niin a tarlang. Mipui lungawi lohna avang hian sorkar chu a harh chhuah a ngai a ni, a ti.

Nawrh huaihawtnaa buaina chhuak vang hian Leh huam chhungah curfew puan zui a ni a, mi pali an thih bakah hian mi 90 dawnin hliam an tuar bawk. Ladakh mipui hian dan anga humhimna leh state nihna pek chu an thil ngiat ber niin, an thil phut vanga nawrhna thlengah hian mi 50 man an ni tawh. Ladakh hmun hrang hrangah hian buaina sosang tur ven nan police leh paramilitary force te'n venhimna an thawk zui reng a ni.