President Murmu-i'n Geoscience Awards 2024 hlan

President Droupadi Murmu chuan nimin khan Rashtrapati Bhavan Cultural Centre-ah geoscience huanga thawk ṭhate hnenah National Geoscience Award 2024 a hlan.

President chuan mihring hmasawnna leh ṭhannate chu leilung hausakna hai chhuah hmanga ṭhen a nih thu sawiin, hmasawn leh changkang zel tura rare earth mineral a pawimawh thu a sawi. Mihring hmasawnna lian tham reng reng chu mineral laihchhuah hrang hrang Stone age, Bronze Age, leh Iron Age-te a ṭhen a nih thu sawiin, heng mineral-te hi a laimu a ni, a ti bawk. Mining chuan economic ṭhanna leh hnathawh tur ṭhahnem tak a pek theih thute a sawi lang bawk.

Murmu chuan leilung hausakna hai chhuah hian kawng hrang hrangah a ṭha lo lam nghawng a neih theih thu sawiin, chenna hmun sawn ngaite, ramngaw chereu bakah boruak leh tui bawlhhlawhnate a thlen thei tih a sawi. Heng thil a thlen theih vang hian khauh taka kaihhruaina mumal siam chu a ṭul a ni, a ti bawk. Kan chhehvel thil awm tichhe tlem tur chuan kaihhruaina siamte zawm hram hram a ṭul thute a tarlang nghal.

Rare Earth Elements (REE) chu technology tunlai zawk thlen theihna tura thil pawimawh ber a nih thu leh hengte hian tunlai kan thil hman tam zawk, smartphone aṭanga defence system thlenga ṭangkai a nih thu president Murmu chuan a sawi. India chuan REE-ah intodelh a, mahni kea a din chu a tum ber a nih thu a tarlang.