HP-ah fur laia chhiatna thlengah mi 424 thi

Himachal Pradesh-a State Disaster Management Authority (SDMA) in a tarlan danin, kumina fur ruahsurin chhiatna a thlenah mi 424 an thi tawh a, chin hriat lohin mi 45 an awm mek bawk.

Fur chhung hian state-in ruah bawhawk sur ṭum 46 dawngin, sabereka khuangkaih ṭum 98 leh leimin lian tham ṭum 146 an tawk bawk. Ningani zana ruah nasa tak a sur chhunzawm avangin India Meteoroligical Department (IMD) chuan nimin khan Bengaluru huam chhungah 'Yellow alert' an tichhuak a, darkar 24 chhungin ruah 65.5 mm a sur tling hman bawk. Ruahsur vang hian Dehradun-Mussorie inkalpawhna kawng pawh a chhe nasa hle a; Sonbhadra, Uttar Pradesh-a Rihand dam pawh kumina a ṭum ngana a tan a kuangah a luang liam leh bawk.

HP-a chhiatna thleng vanga bungraw chan takte hi Rs vbc 4,749 hu vel niin, chenna in 1,604 chuang a chhiat bakah tranformer 228 leh tui pekchhuahna 221 a chhe tawh a ni.

Uttarakhand-a Chamoli district-a Nandnagar-ah Ningani khan ruah bawhawk surin leimin thlen lehin chenna in 35 a hnawl chhia a, leiminin a chhilh aṭangin mi pakhat nungdamin chhanchhuah a ni. Nung dama lak chhuah hi darkar 16 dawn hnuah a ni a, mi dang eng emaw zat chu leimin hian a la chhilh niin an tarlang.

Kumina fur ruahsur vang hian ram chhung hmun hrang hrangah chhiatna a thleng chhunzawm reng a, IMD chuan nimin khan Punjab hmun ṭhenkhatah ruah nasa tak sur tur angin hriattirna a tichhuak. Hei bakah Tamil Nadu-ah pawh ruahsur vanga chhiatna thlengah mi pahnih an thi tawh a, Karnataka-ah pawh district hrang hrangah ruah a sur nasa a, chawh rualin ruahtui 112 mm an dawng anga chhut a ni bawk.