India-in PAK-Saudi Arabia defence inremna zirchiang dawn

Pakistan leh Saudi Arabia-in defence huanga thawh dunna tur an tihfel hnuah, India chuan nimin khan inremna siam chungchang hi India himna nghawng thei thil nia a hriat avangin a zirchiang dawn tih a sawi. Pakistan leh Saudi Arabia-ten thuchhuah inṭawn siamah hian " Ram pahnih tu emaw zawk zawk thinrimna thlentu chu ram pahnih hmelma a ni ang" tih a awm tel a ni.

Pakistan leh Saudi Arabia inremna siam hi "Strategic Mutual Defence Agreement," tih a ni a, Pakistan prime minister Shehbaz Sharif leh Crown Prince Mohammed bin Salman-te'n Riyadh-ah an ziak. Defence huanga inremna siam a nih hnu hian external affairs ministry chuan India nghawng pawi thei thil a awm em tih chu uluk takin a zirchiang dawn tih sawiin, mah se eng ang tehna aṭangin nge zirchianna a neih dawn tih a tarlang lo thung.

MEA thupuangtu Randhir Jaiswal chuan,"India a nghawng theih dan leh ramchhung leh khawvel himna tichhe thei a nih leh nih lo thlir hmasak tur a ni. Sorkar chuan ram himna tur chu a ngaih pawimawh ber a ni a, venhimna pawh ram tana a ṭha ber turin ngaihtuah tum a ni," a ti bawk. Hetih laiin Pakistan leh Saudi Arabia defence huanga thawh dunna hi thil thar a ni lo a, India leh Suadi Arabia pawh hi oil hmanga sumdawn tawnna kalpuina nei mek an ni bawk.