SC-in loneitute nawrh huaihawtin Hri a tihdarh zual hlauhthawng

Supreme Court chuan sorkar laipuiin farm law pathum a siam thar duhlohna lantira loneitute nawrh huaihawt chuan Delhi bakah National Capital Region (NCR)-ah coronavirus hri leng mek chu a tihdarh zual a hlauhthawnawm tih a sawi. 

Hun rei tak loneituten nawrh an huaihawt hnua tun thlenga sorkarin inremna a la siampui thei lo chu a lawmawm lo hle tih sawi bawkin, chief justice of India (CJI) SA Bobde chuan thil awmdanah hian engmah hmasawnna a la awm lo a ni, a ti. 

Supreme Court chuan sorkar laipui hnenah loneituten nawrh an huaihawt mek karah hri darh tur venna atana eng ang hmalakna nge a neih sawi turin a ti. Loneitu leh sorkar laipui aiawhte hian ṭum sarih inbiakna nei tawh mah se inremna tluantling an la siam thei lo a ni. 

Ningani khan loneitute hian an awmkhawmna, Delhi  border-a hmun paliah an lungawi lohna lantirin tractor rally an huaihawt a, hei hi January 26-a Delhi khawpui chhung pana tractor rally huaihawt an tum lo enlawkna niin an sawi. Loneitute hian sorkarin farm law pathumte sut leh vek a remtih loh chuan Republic Day niah border point hrang hrang aṭangin Delhi khawpui chhungah tractor rally neih an tum thu an lo sawi tawh a ni. 

Nimin khan loneitu leh sorkar aiawhte chu inremna kawng zawngin an inbe leh a, hei hi loneituten nawrh an huaihawt hnuah an inbiak ṭum riatna a ni. Inbiakna hi New Delhi-a Vigyan Bhavan-ah neih a ni. Inbiakna neih hmaa chanchinthar lakhawmtute a kawmnaah, union agriculture minister Narendra Singh Tomar chuan farm law pathum sut tura ngenna ni lo, loneitu lamin rawtna dang an neih phawt chu sorkar chuan ngaihtuah a inhuam tih a sawi.