Loneituten apple ṭawih box 2,000 paih

Srinagar-Jammu kawngpui khar a nih avanga motor tangkhang zinga Kashmir loneitute thar chhuah, apple box 2,000 chuang chu a ṭawih avangin paih a ni. Heng apple-te hi September 4 khan Aligarh leh Sahibabad, Uttar Pradesh-a thawn turin truck pahnih hmangin phurh chhuah a ni.

Ruahsurin kawngpui hmun ṭhenkhat a tihchhiat avangin Srinagar-Jammu highway hi hun eng emaw chen khar a ni. Apple thawn chhuahte hi ruahsur vanga kawng pingah hun rei tak chhung a tang khang, thei dang phur truck pawh kawng hrang hrang ping vang hian eng emaw zat a tang mek bawk.

Srinagar-Jammu highway hi J&K tlawh pawhna all-weather road awmchhun a ni a, mahse kuminah ruahsur vanga lei a min fo avangin August 24 aṭang khan a ping. Kashmir chhim lamah truck 4,000 vel chu kar hnih vel an tang tawh nia sawi a ni. Kashmir-a thlai chin tam tak an thar chhuah vanglai a ni mek a, mah se kawng a pin avangin harsatna an tawk a, thei man a tlakhniam phahin an eizawnna in a tawrh phah hle tih an sawi.