Kerala budget session-ah speaker bang turin phut

Kerala chuan kum 2021-22 atana budget session chu nimin khan a nei ṭan a, he hunah hian speaker P Sreeramakrishnan chu eptuten bang turin an phut a ni.

Session neih lai hian governor Arif Mohammad Khan-in 'policy address' a neih chu duh loin eptute hi house aṭang an chhuak tau a ni. Governor-in house-a thu a sawi lai hian eptute chuan house speaker P Sreeramakrishnan leh chief minister Pinarayi Vijayan chu an au el a, governor chuan house chhunga dan anga thu a sawi lai chu tibuai lo turin eptute hi a ngen hial.

Speaker P Sreeramakrishnan hi rangkachak (gold smuggling case) tawlhrukna a inhnamhnawih nia an puh vangin eptute hian bang turin an phut a ni. Eptute chuan house a ti zahawm lo niin speaker chu an puh. Ni li liam taah khan customs department chuan speaker additional personal secretary, K Ayyappan chu rangkachak tawlhruk chungchanga thu zawhfiah turin an ko a, mahse K Ayyappan hi customs hmaah hian a in lan lo. A hnuah Assembly secretary chuan customs department hnenah lehkha thawnin speaker rem tihna loa Assembly staff an ko ringawt chu thil dik lo a nih thu lehkha an thawn.

Nimin khan Kerala Assembly speaker P Sreeramakrishnan-a additional personal secretary, K Ayyappan chu customs official-te hmaah a inlan ta a, ani hi speaker zin leh a programme zawng zawng hre vektu a nih vanga koh a ni.