PM Modi-a'n MP-ah PM MITRA Park lungphum phum dawn

Prime minister Narendra Modi chuan vawiin hian Madhya Pradesh-ah PM Mega Integrated Textile Region and Apparel (PM MITRA) Park, ram chhunga a hmasa ber tur siamna tur lungphum a phum dawn. Hemi rual hian 'Sewa Pakhwada' ni 14 chhung awh tur hawnna hun a hmang nghal dawn niin Madhya Pradesh chief minister Mohan Yadav chuan a sawi.

PM Modi hian 'Swasth Nari Sashakt Parivar Abhiyan' chu vawiin vek hian Bhainsola khua, Dhar district-ah a tlangzarh nghal dawn bawk. 'Sewa Pakhwada' campaign kaltlang hian health and nutrition camp hrang hrang chu Ayushman Arogya Mandirs leh Community Health Centers-ah huaihawt a ni dawn a, thisen pekna hun siam a ni dawn bawk.

Park siam tur hi Farm-to-Fiber-to-Factory-to-Fashion-to-Foreign 5F behchhan a siam tur niin, chhungkaw eng emaw zat tan eizawnna a siam sak thei dawn bawk. PM MITRA park hi ram acres 2,158 awh tur niin ram acres 1,300 chu zawhfel a ni tawh bawk. Park siam tur vang hian Dhar district-ah textile company lian 114 chuangin Rs vbc 23,000 investment an ti tawh niin an tarlang.