ECI-in CEO conference a buatsaih; Ram puma SIR kalpuina tur ennawn

Election Commission of India (ECI) chuan Nilaini khan state leh union territory zawng zawnga chief eletoral officer-te pualin conference a buatsaih a, ram puma electoral roll ennawnna, Special Intensive Revision (SIR) kalpuina tura inbuatsaih dante ennawn a ni.

Commission chuan SIR hi ram pumah a rualin, thawh khata kalpui a tum nia sawi thawm a awm a, hetih lai hian nakkum April-May a assembly inthlan neihna tur state leh UT - Assam, Kerala, Puducherry, Tamil Nady leh West Bengal-ah kalpui hmasak a nih phawt dawn nia sawi a awm bawk. Commission lam chuan hemi chungchangah hian thuchhuah engmah a la siam lo.

Conference hi chief election commissioner Gyanesh Kumar-a'n a hawng a, election commissioner Sukhbir Singh Sandhu leh Vivek Joshi te pawh an tel. Commission chuan state/UT CEO office-ten SIR kalpuina tura an inbuatsaih dante an zirchiang a ni.

Ram chhunga SIR neihna hmasa ber, Bihar state CEO Vinod Singh Guniyal chuan an state-a an kalpui dan hrang hrangte a sawi hmasa ber a ni. CEO dangte pawhin elector awm zat leh, roll ennawnna neih hnuhnung ber a nih hun te, website-a SIR hmasa upload a nih dante an sawi. Khual leh tui dik tak finfiahna tura document pawm tura rawtnate pawh an siam bawk a ni.

Supreme Court chuan Thawhṭanni khan ECI hnenah voter list ennawnna tura document pawm zingah Aadhaar telh turin a ti a, hemi rual hian Adhaar hi khua leh tui nihna finfiahna atan erawh hman theih a ni lo thung.

ECI hian kumin June 24 khan ram pumah SIR neih a nih tur thu hi a sawi a, Bihar-ah nei hmasa berin hmun dangah chhunzawm a ni dawn tih a puang a ni. SIR neih hnuhnung ber chu kum 2003 kha niin, khawpuia pem leh ram dang aṭanga pem lut an pun chhoh avangin SIR hi neih leh ngei a ṭul tih a sawi a ni.