J&K-a AAP MLA man vangin buaina chhuak

Jammu and Kashmir-a Doda district-ah Doda-a Aam Aadmi Party (AAP) MLA Mehraj Malik man a nih avangin buaina a chhuak a, hei vang hian thuneitute chuan punkhawm khapna thupek tichhuakin, district pumah mobile internet leh broadband service tihtawp a ni.

Mehraj Malik hi Thawhṭanni zan khan manin Public Safety Act (PSA) hnuaiah thubuai siamsak a ni a, Kathua jail-ah dah a ni. J&K MLA nilai zingah PSA hnuaia man hmasa ber niin, hemi hmang hian kum hnih thleng thubuai siamsak kher loin hren theih an ni. Malik sorkar enkawl Ayushman Arogya Mandir/Health and Wellness Centre, Kencha khua ami building insawnna turah a rawt anga pawm a nih loh avangin he centre-a damdawi lam hmanrua leh damdawi ṭhenkhatte tharum hmanga lachhuak leh, emergency service tibahlah leh damdawi sem chhuah thlenga harsatna thlenah puh a ni. Malik chuan Doda-a Chief Medical Officer hnenah tualchhung mipuite duhdan anga centre awmna chu sawn turin ziakin a ngen a, hetih lai hian Deputy Commissioner chuan building sawnna tura 'mafia' a duhsak zawk a, official-te lakah ṭawngkam chhe tak tak a hmang niin a sawi ve thung.

AAP MLA man a nih hnuah Thawhlehni tlai aṭang kan district chhunga hmun eng emaw zatah party worker-te chuan lungawi lohna an lantir a, hmun ṭhenkhatah chuan police-te nen innawr buaiin, pungkhawm hnawhdarh nan police-te'n smoke shell te an hmang bawk. Party thupuangtu Mudasir Hassan chuan an MLA man a nih chungchang hi J&K High Court-ah an khing dawn tih a sawi.