PM Modi-a'n HP leh Punjab-a tuilenna hmun a enkual

Prime minister Narendra Modi chuan nimin khan Himachal Pradesh leh Punjab-a tuilian leh leimin nasa tak thlenna, Mandi leh Kukku district-te chu thlawhtheihna aṭangin a enkual.

Prime Minister hian vice-president thlannaah vote a thlak hnuah, chawhnu lamah Himachal Pradesh hi a tlawh a ni. Chawhnu dar 1:30 vel khan Kangra thlengin, high-level meeting a kaihruai nghal a ni. Tuilian tuartu mi ṭhenkhat bakah chhan chhuah hna thawktu NDRF, SDRF leh Aapda Mitra team-te a kawm bawk. Review meeting-ah hian state governor Shiv Pratap Shukla, chief minister Shukvinder Singh Sukku baka union minister JP Nadda te an tel.

Himachal Pradesh-a chhiatna thlenna hmunte a enkual hnuah, Modi hian chawhnu dar 3 khan Punjab-a tuilenna hmunte a enkual leh bawk. Hemi hnu hian Punjab official-te nen review meeting neiin chhiatna thleng tuartu ṭhenkhatte a hmu bawk a ni.

Punjab hian tuilian vangin harsatna a la tawk mek a, chhiatna thleng vanga thi hi mi 51 an tling tawh bawk. Lui hrang hrangte a len nasat avangin mi sing tel chu hmun him lamah sawn chhuah an ni. Himachal Pradesh-ah pawh ruahsur nasa avanga tuilian leh leimin thlengah mi 370 an thi tawh tih state disaster management authority chuan a tarlang. Nimin thleng khan kawng 619 chu khar an la ni a, heng zingah hian national highway pali an tel. Tuilian vang hian chenna in 6,344, dawr 461 leh factory eng emaw zat a chhe bawk.