ECI in SIR chungchangah state CEO meeting huaihawt dawn

Election Commission of India chuan state leh Union Territory chief electoral officer (CEO) zawng zawng huap turin September 10 hian conference a huaihawt dawn. Conference hi rampuma electoral roll-a Special Intensive Revision (SIR) kalpui tumna atana inbuatsaihna leh in puahchahna tura tih a ni. Chief election commissioner Gyanesh Kumar-a'n kumin February-a a hna chelh hnuah CEO meeting neih vawi thumna tur a ni ang.

Senior ECI official chuan meeting neih tur chu an tihdan phung ṭhin a ni tih sawiin, tun ṭuma meeting-in a tum ber chu rampuma SIR kalpui tur atana inpuahchahna a nih thu a sawi. CEO tel zawng zawngte chuan state leh UT tina voter awm zat leh ennawnna kalpui tawh hnuhnung ber neih dan kimchang presentation an nei ṭheuh dawn tih a tarlang.

Election commission hian June 24 khan rampumah SIR kalpui tum a nih thu hi an tarlang tawh a; mahse, inthlan hmabak Bihar-ah chiah neih a la ni. ECI tarlan danin rampuma SIR kalpui hi nakkum 2026 January 1 aṭanga ṭan an tum. Electoral roll hi kumtin emaw inthlan neih hma kumah ennawn ṭhin niin, ennawnnaah hian document chi hrang hrang 11 hmangin roll list hi endik ṭhin a ni.