BJP-in rampum huap GST sawifiahna kalpui dawn

Bharatiya Janata Party (BJP) senior leader leh worker-ten rampumah state, district, leh block level-ah Goods & Services Tax (GST) siamthar chungchang sawifiahna leh vantlang tana a ṭha zawnga nghawng a neih theih dan tur sawifiahna kalpui an tum tih union minister Ashwini Vaishnaw chuan thuthar lakhawmtute a kawmnaah a sawi. GST rate thar hi September 22 aṭanga hman ṭan tura ruahman a ni.

GST rate siamṭhat chu prime minister Narendra Modi-a kaihhruai sorkarin middle class-te dinhmun a ngaihpawimawh zia tilangtu a nih thu Vaishnaw chuan sawiin, tunhma pawhin middle-class-te tan tax a ngaihhnathiam sak tawh a ni, a ti. GST rate thar chuan middle class chhungkaw hahdamna a thlen leh dawn bawk a ni, tiin sector hrang hrang nasa taka ṭhan tirin, thil siam chhuah a pung dawn a, hna a siam belh bakah kawng engkimah economy ṭhanna thlenin savings, investment leh senso thlengin a nghawng thei dawn a ni, a ti bawk.

Vaishnaw chuan tun hun hi India mahni kea din hun chiah a ni a, hei hi "Swadeshi" ramchhunga thil siam chhuah tihpunna hun a nih thu a sawi. Mipuite chuan ram chhunga siam chhuah an ngaihpawimawhna a zual phah a, sector hrang hrang pawl zawng zawng deuh thaw chuan GST thar hian hlawkna a thlen ngei dawn niin an ngai bawk tih a sawi.