Rahul Gandhi-a'n tuilian tuarte chhawmdawlna pe turin PM ngen

Congress party hruaitu Rahul Gandhi chuan nimin khan tunlaia ramchhung hmun hrang hranga ruahsur nasa vanga tuilian tuarte tan chhawmdawlna 'special relief package' pe turin prime minister Narendra Modi a ngen. Chhawmdawlna pe tura a ngen sakte hi Punjab, Jammu and Kashmir, Uttarakhand leh Himachal Pradesh-te an ni.

Rahul chuan,"Tuilian vangin Punjab, Jammu and Kashmir, Uttarakhand leh Himachal Pradesh-ahte chhiatna nasa tak a thlen avangin an mangang tawh hle a, hun harsa tak an tawh mek lai hian sorkar laipui aṭangin chhawmdawlna dawn an mamawh takzet a ni. Chhungkaw sang chuangin chenna in, nunna leh an hmangaihte an chan phah a ni" tiin X-ah a tarlang.

Tun hnaiah ruahsur nasa vangin India hmar lamah harsatna a thleng nasa hle a, kawng chhia, rel kawng hman theih loh leh zirna in eng emawzat khar a ngaih phah tawh a ni. Punjab hian kum 1988 hnua tuilian a tawrh nasat ber ṭum an tawng mek a, district 12-ah tuilian vangin mi 29 thi tawhin mi nuai 2.56 a nghawng bawk. Uttarakhand-ah pawh saberekakhuangkaih vangin kawng 1,000 a chhiat phah tawh a; Kangra, Mandi, Sirmaur, leh Kinnaur district-ah orange alert tihchhuah a ni bawk.