IMF director atan RBI governor Urjit Patel ruat

Appointments Committee of the Cabinet chuan Reserve Bank of India (RBI) Governor hlui Urjit Patel chu International Monetary Fund(IMF) Executive Director atan Ningani khan an ruat, IMF director hna hi kum thum chhung a thawk ang. Patel hi RBI Governor 24-na turin 2016, September 16 khan ruat a ni a, a thawh hun chhung ral hmain a mimal harsatna vangin a lo inhnukdawk tawh a ni.

International Monetary Fund executive direector thar , Patel hi economist niin, RBI-ah hian deputy governor a lo ni tawh ṭhin bawk. IMF hnuaiah hian kum 1996-1997 chhung khan central bank hnuaiah debt market huanga thurawn petu, sector siamṭhatna tur, pension fund siamṭhat leh foreign exchange market-te enkawlna lamah a lo thawk tawh ṭhin bawk.

Patel hian June 2020 aṭangin New Delhi-a awm National Institute of Public Finance and Policy-ah chairman hna a chelh a, director a ruat a nih ni thleng hian a la chelh a ni. IMF-a executive director a nih rual hian multilateral agency hrang hrangah executive board a ni dawn a; national, regional, leh global huangah endik hna hrang hrang thawh ngai a thawk nghal dawn a ni.