SC-in comedian-te an channel-ah ngaihdam dilna tichhuak turin ti

Supreme Court chuan comedian Samay Raina leh mi dang palite chu taksa lama rualban lote chungchang an sawi danah ngaihdam dilna chu an YouTube channel leh platform dangahte tichhuak turin a ti.

Justice Surya Kant le justice Joymalya Bagchi awmna bench chuan spinal muscular atrophy neitu puitu, Cure SMA India Foundation-in Raina leh mi dangte lakah an thusawi chungchanga petition a theh lut a ni. Raina leh mi dangte hian court-ah ngaihdam dilna lehkha an theh lut tawh bawk. Nimin khan court chuan YouTube leh online platform dangah ngaihdam dilna hi tichhuak turin a ti a, pianphunga rualban lote harsatna tawh ṭhin chungchangah inzirtirna nei tura rawtna awmte pawh chhang turin a ti bawk.

Cure SMA India Foundation chuan Raina hian spinal muscular altrophy enkawlna hautak chungchangah ṭawngkam mawi lo tak chhak chhuakin, he natna neite pawh fiamthu thawhna atan a hmang niin an puh. Petition an theh luhah hian rualban lohna neite dikna chanvo leh zahawmna tichhe thei zawnga online content siam chungchangah khuahkhirhna siam turin an ngen bawk a ni.