Delhi-ah loneitute ‘Kisan Mahapanchayat' a tel turin pungkhawm

Ram chhung hmun hrang hrang aṭangin loneitu ṭhahnem tak chuan Jantar Mantar, Delhi-a ‘Kisan Mahapanchayat' a tel turin nimin khan an pungkhawm. ‘Kisan Mahapanchayat' hi loneitu pawl Samyukt Kisan Morcha(SRM) huaihawt niin, sorkar laka an thil ngiat puitlin a nihna atana nawrna tura tih a ni.

Loneitu pungkhawmte hian sorkar laipuiin hun rei tak aṭangin thlai thar zawng zawng leh agriculture, dairy, ran vulh leh sangha a eizawngte tana puihna tur minimum support price (MSP) mumal siam turin an ngiat a ni. US-in sumdawn tawnna atana an thil phutte chu ram chhung loneitute nghawng chhe thei a nih dawn avangin hnawl vek turin sorkar an phut bawk.

Punkhawmna hi kum 2020-21 a farmers' movement an kalpui aṭanga kum li hnuah huaihawt leh niin, hemi ṭum hi sorkar chu loneitute tana dan pathum an siam ennawn tura an ngiatna a ni thung. Sorkarin an thil ngiatte tihhlawhtlin an tiam hnuah movement an kalpui hi tihtawp a ni. Mahse, sorkar hian a intiamnate a tihhlawhtlin loh vangin punkhawm hi an huaihawt leh a ni.

SRM chuan punkhawmna chu ralmuang thei anga kalpui tur leh ram chhunga loneitu zawng zawng tel turin an sawm. Delhi police chuan dan leh thupek kenkawh a nih theihna turin thawktu mi 1,200 an duty tir niin an tarlang a, dan bawhchhiatna lam a thlen lohna turin an vil reng dawn tih an sawi.