INDIA bloc-in CEC impeachment motion put luh tum

Eptu pawl intelkhawm, INDIA bloc chuan Parliament-ah Chief Election Commissioner (CEC) Gyanesh Kumar lakah a hna chelh aṭanga ban tirna tur, impeachment motion put luh an tum.Thutlukna hi Thawhṭannia INDIA bloc hruaitu ṭhukhawmin an siam a ni.

CEC Kumar hian Pathianni khan Congress-in vote tichingpen anga Election Commision of India an puhnate chu behchhan tur awm lo leh ram danpui tihhmingchhiat tumna a nih thu a sawi.

Kumar hi CEC aṭanga ban tir tur hian India danpui-a Article 324(5) hnuaiah Parliament-a motion put luh chu member hmun thuma ṭhena hmun hnihin an thlawp a ngai a ni. Hemi hlawhtlin theihna tur hian INDIA bloc member hian mamawh zat member an nei pha lo thung. Motion put luh pawm a nihna tur hian member 50 talin hming ziah a ngai bawk.

Bang tura phutna hi CEC-in New Delhi-a thuthar lakhawmtute a kawm ṭuma Congress-in commission chu rorel lai party duh zawng chauh anga hmalaah an puhna chu thudik lo a nih thu a sawi hnu leh, an puhnate chu finfiahna awm lo behchhan tur pawh nei lo a ni a tih hnuah an siam a ni. Hetih laiin Jharkhand Mukti Morcha (JMM) party chuan chuan Rahul Gandhi-a'n vote tihchingpenna document a neih chu a tak a ni em tih finfiah turin an phut ve nghal.

ECI chuan Pathianni liam ta khan vote tichingpena puh an nihnaah, Rahul Gandhi chu a thil neihte a dik tak zet a nih chuan a tichiang tura affidavit nen tihchingpen a nih dante tarlang turin an phut tih an sawi. CEC Kumar chuan eptu pawlin an ngiat machine-readable voter list leh CCTV inthlan laia hmante tarlang tura phutnate chu a hnawlsak tawh bawk. Rahul hian August 7 khan Mahadevapur-a inthlan buatsaihah vote thlak dan kalpui dan dik lo hrang hrangte thuthar lakhawm tute a kawmnaah a lo tarlang tawh a ni.