Congress-in Modi sorkar chu thlei bik neiah puh

Congress party chuan tun hnaia union cabinet-in semiconductor siamna tur atana project thawh tur a pawm tharah eptu pawl rorelna state-te chu ngaihthah bik an ni tih nimin khan an tarlang. Union cabinet hian project pali Rs vbc 4,594 hu thawhna tur a pawm a ni.

Prime minister Narendra Modi sorkar chu semiconductor siam chhuahna tur project thawhna hmun state thlan kawngah duhsak bik a nei niin Congress general secretary in-charge communications Jairam Ramesh chuan a sawi. Ramesh chuan," Private company-in tih tur ṭulte tia Telangana-a project thawhna tur dilna an thehluh vek tawh hnuah, Andhra Pradesh-ah zawk an sawn leh a ni" tiin X kaltlangin a tarlang.

Ramesh chuan hetiang chiah hian semiconductor siamna tur project pahnih pawm fel tawh chu Telangana aṭanga Gujarat-ah sawn a lo ni tawh bawk niin a sawi a, Tamil Nadu-a thawhna tur duan pawm vek tawh hnuah Gujarat-ah sawn leh a nih thu a sawi bawk. Hengte vang hian Ramesh chuan India hmasawnna turin duhsak bik nei loin state hrang hrang in elna awm hi a ṭha zawk niin a sawi.

Union minister Ashwini Vaishnaw chuan project thawhna tur Odisha leh Andhra Pradesh chief minister te chu project pawm a nih hnu hian be nghalin, project thawhna hmun chu a rang thei anga siam nghal a nih tur thu leh, kum 2-3 hnuah hman theih a ni dawn tih a tarlang.