ECI-in 'vote chori' a puhnaah finfiahna tarlan an phut

Congress leader Rahul Gandhi leh eptu pawl INDIA bloc te'n inthlan leh Special Intensive Revision (SIR) kalpuinaa 'vote chori (vote rukna)' tia dik lo leh mawi lo taka an puhna awmte Election Commission of India(ECI) chuan a finfiahna tarlan an phut thu nimin Ningani khan thuchhuah siamin a tarlang.

ECI chuan an puhnate hi thil dik lo leh ram chhunga voter vaibelchhe tam tak zah lohna leh puh chhiatna a ni tih an tarlang. ' One Person, One Vote' kalpuina dan chu kum 1951 - 52-a India-a inthlan kalpui hmasak ber aṭang khan hman a nih thu an sawi a, "Tupawh vote vawi hnih thlak an awm tih an hriat chuan, affidavit nena intiamin a finfiahna commission-ah rawn keng rawh se" an ti.

Rahul Gandhi chuan August 7 khan New Delhi-a thuthar lakhawmtute a kawmnaah, kum 2024-a Bengaluru Central Lok Sabha-a Mahadevapura assembly constituency inthlannaah vote nuai khat aia tam ruk awm niin a lo tarlang tawh a ni. Heng vang hian Congress-in hnehna an chang lo niin a tarlang tel bawk.

Heng thilte a nih avang leh eptu pawl hrang hrangten ECI an beih chhunzawm tak reng avang hian commission lam chuan thil fel lo awm tihfiahna chu an phut thu an tarlang a, Rahul chu a thil hriatte chu ziaka tihchianna thehlut turin an hriattir nghal a ni.