ECI-in Bihar roll tihsual awm siam ṭhat inhuam : SC

Bihar-a Special Intensive Revision (SIR) kalpui dan fel lo avanga petition theh luhte supreme court-in hearing a neih hnuah, Thawhlehni khan Election Commission of India (ECI) chuan tihsual awmte siam ṭhat a inhuam thu a sawi. SC hian SIR chungchangah thil fel lo a awm anih chuan a inrawlh tur thu a lo sawi tawh a ni.

Justices Surya Kant leh Joymalya Bagchi ṭhutna bench-a hearing neih hmasa berah hian SIR khingtu aiawh senior advocate Gopal Sankaranaryanan chuan," Voter tam tak tihbo an nih chuan inrawlh in lo intiam tawh a, mipui nuai 65 chu August 1 a draft roll tihchhuahah khan tihbo ngei an ni" a ti. Poll body aiawh senior advocate Rakesh Dwivedi chuan,"Draft roll chauh a la ni a, booth level officer-ah siam ṭhat theih a la ni" a ti ve bawk.

Khingtu lam aiawh senior advocate Kapil Sibal chuan roll ennawnna constituency lian lo aṭangin mi 12 thi anga chhinchhiah chu an la dam tih hriat chhuah a nih thu a tarlang. Dwivedi chuan thil dik lo awm vanga chhuichianna phutte chu an hming pe turin a ngen zui ve bawk. Hetih laiin Sibal chuan Bihar-a mi cheng tam zawk chu mi rethei niin document ECI-in a phut ang nei lo an nih thu a sawi ve thung.

Hearing neihnaa tel, activist Yogendra Yadav chuan Bihar-ah kum 2003 khan roll ennawnna neih a nih thu a sawi a, justice Kant chuan hemi hun laia roll a awmte chuan roll-a awm turin document an neih kher a ṭul tawh loh thu a sawi lang. Hetih laiin advocate Prashant Bhushan chuan poll panel-in draft roll aṭanga paihte, paih an nih chhan kimchang an kawl thu bench hmaah hian a tarlang ve bawk.