Congress-in ram pum huapa nawrh huaihawt tum

Congress party chuan kum 2024-a Karnataka Parliament inthlanah vote lem tam tak awmin, BJP an chak theihna turin vote lem siamnaah Election Commission of India (ECI) a thawhpui nia a sawi hnuah, he thil thleng duh lohna lantirin ram pum huapin kawng hrang hrangin nawrh huaihawt an tum.

Congress MP-te hian Parliament-ah vote lem/vote ruk chungchangah lungawi lohna pawh an lo lantir tawh a, hemi hnuah ECI nawrna turin programme siam chhoh an tum a ni. Kawngzawh leh signature campaign-te neih an tum.

Party hruaitu, Lok Sabha-a leader of opposition Rahul Gandhi chuan vote lem chungchangah data tam zawk an la nei dawn tih a sawi. 'Ram danpuiah mi pakhatin vote pakhat a nei tur a ni, tih chu humhim zel an tum. He dan kenkawh hi ECI tihtur pawh a ni bawk a ni," a ti.

Vote lem siam duh lohna lantirin Congress hian August 22-September 7 chhungin state headquarters tinah ‘Vote Thief-Leave the Throne’ tih thupui hmangin kawng an zawh dawn a, September 15 - October 15 chhungin signature campaign neih an tum bawk. Zanin hian ram chhunga district headquarters zawng zawngah 'Save Democracy Torch Procession' an huaihawt bawk ang.

Congress party student wing, National Students' Union of India (NSUI) hruaitu Kanhaiya Kumar chuan party hruaitu, Rahul Gandhi chuan vote ruk a nih dan chiang takin ram mipui hmaah a rawn pho lang a, kan ramah democracy chu rahbehin a awm tih a chiang hle a ni tiin, "Congress party chuan vote ruk leh vote lem siam hi kan theihna zawng zawngin kan do dawn a ni," a ti.

Party president Mallikarjun Kharge pawhin nimin khan inthlannaah vote lem hmanga vote thlak a nih dan video a tichhuak bawk a, ram mipuite chu dik lo taka BJP-in ram an lakna dodal a, ram danpui humhim tura aw chhuah turin a ngen. Kharge chuan, "Vote thlak tura in dikna chanvote laksak tir suh u. Zawhna zawt ula, chhanna pawh beisei nghal rawh u. Vote lem siam chungchangah aw in chhuah a ngai," tiin video-ah hian a sawi.