Congress-in Sports bill pawm chungchangah sorkar bei let

Congress party chuan Thawhṭannia National Sports Governance Bill, 2025 Lok Sabha a pawm chungchangah sorkar a bei zui. Bill thar a pawm hian ramchhunga sport inrelbawlna huangah thuneitu sangte chauh dah pawimawh a ni leh dawn a ni, an ti. Sports bill pawm tak chu Rajya Sabha-ah ngaihtuah ve an duh thu Jairam Ramesh chuan X kaltlangin a tarlang bawk.

Congress general secretary in-charge communications Jairam Ramesh chuan Board of Control for Cricket in India (BCCI) chuan duhsak a hlawh dawn tih sawiin, RTI hmang pawhin hmalak theih a ni leh dawn lo niin bill pawm thar a hmuh dan a sawi.

Parliamentary Standing Committee on Education, Women, Children, Youth, and Sports chairman Digvijaya Singh chuan, Lok Sabha Speaker hnenah Thawhṭanni khan sports bill chu pawm a nih hmain zau zawk leh thuk zawka zirchiang tur committee chu din tura ngenna lehkha a thawn a, mahse a ngenna chu hnawl sak a ni tih Ramesh chuan a sawi. Hengte hi committee din a ngaihna chhan a ni a, mahse Modi sorkarah chuan ngaihpawimawh a ni lo fo a ti bawk.

Hun reitak aṭanga nghah tawh National Sports Governance Bill, 2025 chu Imdependence hnua India-a sports dinhmun siamṭhatna tur lian ber a nih thu sports minister Mansukh Mandaviya chuan a sawi a, Thawhṭanni khan hun rei lote chhung sawi hona neih a nih hnu leh eptu pawlin SIR vanga lungawi lohna an lantir chungin 'voice vote' hmanga pawm a ni zui ta a ni.