'Vote lem' vangin Congress-in lungawi lohna lantir

Congress party chuan Lok Sabha-a Leader of Opposition Rahul Gandhi hoin nimin Zirtawpni khan kum 2024-a Karnataka-a Parliament inthlanah vote lem tam tak a awm nia sawiin lungawi lohna an lantir.

Rahul Gandhi chuan Election Commission of India (ECI) chu he inthlana BJP an chak theihna tura vote lem siamnaah BJP thawhpuiah a puh. Karnataka sorkar chu Bangalore Central Lok Sabha constituency hnuaia Mahadevapura assembly seat-a vote lem awm chungchang chu chhui chiang tura ngenin, he thila inhnamhnawih official-te hrem turin a phut.

Nimina lungawi lohna lantirnaah hian chief minister Siddaramaiah, deputy chief minsiter DK Shivakumar bakah minister leh MLA eng emaw zat an tel.

Congress chuan ECI chu rang taka electronic voting machine data leh video, polling booth-a dahte chu tarlang turin an phut a, Gandhi chuan hengte hi an ti ngam lo a nih chuan a tihchianna tur thupin dan bawhchhiatna an kalpui bakah BJP chu vote ru turin an pui a ni. a ti.

Vote tihchingpen dan kawng hrang hrang awmte Congress hian sawi langin, identity thlalak chu a lem nuai chuang hman a nih bakah, address dik lote siamin voter tam tham tak chu address in ang an ni, an ti. Vote thlak vawi khatna neite chhinchhiahna Form 6 pawh dik lo takin an hmang tih an

tarlang bawk.

Congress chuan BJP chu Mahadevapura seat bakah hnehna an chan theihna turin seat 25 danga inthlanna pawh an tichingpen niin an puh. Hnehna an channaah hian vote 34,000 bawr vela chak an nih thu an sawi. ECI chu BJP tana thawk loin ram danpui tana thawk tur an ni zawk a ni, an ti.