Trade Union-in CETA leh US chhiah lak duh lohna lantir dawn

Central Trade Union (CTU) hrang hrang 10 leh Samyukt Kisan Morcha (SKM) chuan Thawhṭanni khan thuchhuah inṭawm siamin, India leh UK-in sumdawnna lama thawh dunna tur, Comprehensive Economic Trade Agreement (CETA) an ziah chu parliament-a ennawn thuai turin an phut. Hei bakah hian sorkar laipui chu US-in chhiah lak a tihsanna hnawl turin an ngen nghal bawk.

US chhiah tihsan leh India-UK CETA inremna neihte duh lohna lantirin August 13 hian ram pumah lungawi lohna lantir an tum thu an tarlang. CTU-SKM chuan loneitu leh thawktu, zirlai leh ram hmangaihtu zawng zawngte chu lungawi lohna lantirna neih tur hi thlawp turin an sawm. Tractor leh motorcycle hmanga kawng zawh an tum a ni.

CTU-SKM thuchhuahah hian US-in India laka chhiah a lak tur chu hnawl turin an ngen a, India-US inremna lo neih tawh zawng zawng pawh titawp vek turin an phut. Chhiah tihpun chu chungnung zawk nihna hman sualna a ni tiin, ram chhunga loneitute leh agriculture thar chhuah hralhna thlenga nghawng ṭha lo nei thei tur a ni an ti a, CETA leh US trade deal-te chu pawl lian tak hmanga in awp behna thar mai a ni, an ti.

US-in chhiah a tihsan hi US trade policy dahsan bik tum na a ni tiin, hemi hmang hian America sumdawn pawl liante chu ram chhungah sumdawnna kawng zau tak a hawn sak thei dawn a, chhiah tihsan hmanga ramdang awptumna a ni an ti bawk.

UK leh US nena insumdawn tawnna tura inremna neihte chuan ram chhungah industry lama hmasawnna a tihṭhuanawp theih dawn bakah, hnathawh tur awm lohna nasa taka a thlen tur thu te an tarlang.