Thailand leh Cambodia-a India mi awmte tan hriattirna ti chhuak

India sorkar chuan tun hnaia Cambodia leh Thailand ram inkar buaina zual leh, ram pahnih sipaite an inbeih tak avangin heng ram pahniha India mi awmte tan kaihhruaina a ti chhuak a, ramri hnaihah kal lo turin a ti.

Thailand-a India embassy chuan Zirtawpni khan India mi awmte tana hriattirna hi a ti chhuak a, Cambodia-a India embassy chuan Inrinni khan a ti chhuak ve leh bawk. Hriattirna an tih chhuahah hian Thailand leh Cambodia buaina neihna leh an inbeih mekna, ramri hnaivaia kal lo turin an ngen. Thailand lamin mipuite kal lo tura a ngennaah hian province pasarih a tel. Embassy biak pawh theihna tur pawh tarlangin, India mi awmte chu be pawp turin an ti bawk.

Kar liam ta Ningani aṭang khan Thailand leh Cambodia hi ramri bula ram an inchuhna kal zelah an inkap a, US president Donald Trump-in inkahhai puan a nih theihna atana inbiakna nei tura a ngenna chu pawm ve ve mah se nimin thleng khan an la inkap chhunzawm a ni.