Vawiinah Parliament-ah OP Sindoor debate nei dawn

Parliament Monsoon session neih mekah eptu party lamin rei tak an lo phut tawh, Operation Sindoor leh Pahalgam beihna thleng chungchangah vawiin hian debate neih a ni dawn ta. Debate hi darkar 16 chhung neih tura ruahman a ni.

Eptute hian July 21-a Parliament session ṭan a nih aṭangin Operation Sindoor leh Pahalgam beihna thleng chungchang sawi ho phutin House-ah an aubuai reng a, ni nga chhung rorel mumal thei loin an awm tawh. Eptuten sawi ho an phut zingah hian US president Donald Trump-a'n a sawipui avanga India-in Operation Sindoor a ti tawp nia a tarlan pawh a tel bawk.

Ramchhung hnuk khawih thil thleng hrang hrang chungchangah Congress party chuan sorkar hnenah hian ni hnih awh parliament ṭhutkhawm hmanhmawh thlak neih an lo ngiat tawh a, mahse heng an thil ngiatte hi tih hlawhtlin a ni lo thung . Eptu lamin Pahalgam beihna debate an duh chhanah hian, J&K Lieutenant Governor Manoj Sinha-in venhimna ṭhat tawk loh vang anga a lo sawi thawm awmte chu tarlan a ni bawk. Debate hi Lok Sabha leh Rajya Sabha-ahte neih a ni dawn a ni.