Space sector huangah startup 200 chuang awm : PM

Prime minister Narendra Modi chuan thla tina radio kaltlanga thusawina hun a hman ṭhin 'Mann Ki Baat' chu nimin khan a hmang leh a, International Space Station aṭanga khawvela Shubhanshu Shukla a rawn kir leh hnuah ram chhungah space lampang ngaihven nasat a nih thu leh, space sector huangah eizawnna tur bul ṭanna, startup 200 chuang an awm belh thu a sawi. Hengte hi India-in Viksit Bharat ti hlawhtling tura a zinkawng in ṭanna tur a nih thu a tarlang.

Modi chuan India-in mahni kea ding thei tura ke a pen zel thu leh, ramchhung mi ngaih pawimawhna chu Aatmanirbhar Bharat, 'India mahni kea dinna' atana lungphum pawimawh tak a nih thu a sawi. Ram chhunga kawng hrang hranga hmeichhe hmasawnna awmte tarlangin, hmeichhiate chuan Santhali saree an tuaithar leh thute, puantah chu India hnam nunphung pawimawh tak a nih thu sawiin, ramchhungah hetiang lama bul ṭanna 3,000 chuang din thar a ni, a ti bawk.

Ram chhungah infiamna lam chawilar niin, ramchhunga siam chhuah hmanruate hmangin infiammite hman tur chhawp chhuah a nih thute a tarlang a, India chu Olympic leh Olympiad tan a inbuatsaih mek tih PM chuan a sawi.

PM chuan India-in hlawhtlinna a chan hrang hrangte sawiin astronaut Shubhanshu Shukla hlawhtling taka khawvela a lo kir leh chu lawmawm a tih thu a sawi. Chandrayaan 3 hlawhtlinna chuan rampumah lawmna nasa tak a thlen tih sawiin, hei hian ramchhung hmun hrang hranga naupangte thinlungah vanthengrang lam ngaihvenna nasa taka a tih pun thu a sawi lang bawk.

Modi chuan UNESCO-in Marartha kulh 12-te World Heritage Site-a a pawm chu lawmawm a tih thu a sawi bawk a, heng zinga 11 hi Maharasthra ami niin, Tamil Nadu ami pakhat a awm b awk a, kulh tinte hian chanchin ngaihnawm tak an nei vek a ni, a ti.