Indian zirlaiten US student visa dilnaah harsatna tawk

Ministry of External Affairs (MEA) chuan India mi zirlaiten US student visa buaipuina kawngah harsatna an tawk nasa a, hei hi America thuneitute visa dilna kawnga kaihhruaina thar leh endik dan thar an kal pui vang a ni tih a sawi.

US-a lehkha zir turten harsatna an tawh chungchanga Rajya Sabha-a ziaka zawhna a chhannaah, Minister of State for External Affairs Kirti Vardhan Singh chuan visa chungchanga harsatna awm mekah New Delhi-a US embassy leh US Department of State hnenah MEA-in hma an lak mek zel thu a tarlang.

US Department of State (DOS) chuan June 18, 2025 khan visa dilnate chu uluk leh khauh zawka endikna kalpui anih tur thu a ti chhuak a ni. US-a zin tum leh lehkha zir tuma visa diltute chu uluk zawka endikin, an social media khawih dan thlengin US duh loh zawng leh inrelbawlna ti ṭhuanawp theiah an inhnamhnawih em tih endik tel vek a nih thu Minister Singh hian a sawi.