India-in Bangladesh-ah medical team tir

India chuan Nilaini khan Bangladesh-a air force jet chesual, Dhaka-a Milestone College-a a tlak avanga hliam tuar enkawlte pui turin medical team a tir. Air force jet chetsual vang hian a tlakna hmun college-a zirlai leh zirtirtu eng emaw zatin an thih phah bakah hliam tuar tam tak an awm a ni.

Ministry of External Affairs thupuangtu, Randhir Jaiswal chuan Bangladesh-a chhiatna thleng vanga hliam tuar pui tur hian kang enkawl thiam bik leh nursing assistant tirh an nih thu a sawi. India-a kang enkawl thiam bik damdawi-in, Ram Manohar Lohia Hospital leh Safdarjung Hospital-a thawktute hian Nilaini khan Dhaka an thleng a, damdawi-in hrang hrang pakuaa enkawl mekte pui tur hian nimin Ningani aṭangin hna an thawk ṭan nghal bawk.

India bakah ram hrang hrang China leh Japan te'n chhiatna thleng vanga puihna an pek avangin Bangladesh Ministry of Foreign Affairs (MoFA) chuan lawmthu an sawi. Chhiatna thleng vanga Asia hmarlam ram hruaitute in pumkhatna chu Bangladesh hian a hre reng tawh ang, tiin an sawi.

China siam F7 aircraft chesual a, Milestone College-ah a tlak chungchangah Thawhlehni khan zirlaite chuan chhiatna thleng vanga thi leh hliam kimchang hriat duhin nawrh an huaihawt bawk. Chhiatna thlengah hian mi 29 in an thih phah bakah a lo berah mi 57 chu damdawi-ina enkawl turin dah luh nia tarlan a ni.