Kum 14 chhungin Aadhaar number vbc 1.15 ti tawp tawh

India Today TV-in Right to Information (RTI) hmanga Unique Identification Authority a zawhna chhannaah, kum 2010 September 29-a Aadhaar hman a nih aṭangin number pek chhuah hi vbc 1.15 tih tawp a ni tawh tih tarlan a ni. Heng number tih tawpte hi a neitu an thih tawh vang a nih thu tarlan a ni bawk.

Hetih lai hian aadhaar hman tawh loh tih tawp zat hian khang kum 14 liamta chhunga thi zat aiin a tlem zawk fe a ni. Civil Registration System (CRS) official data chuan kum 2007-2019 inkar chhung khan India ramah kumtin mi nuai 83.5 thi ziah angin a tarlang. Heng hun chhunga UIDAI number tih tawp zat erawh a hniam hle a, thi zat aṭanga 10% vel bawr chauh a ni. Official chuan mitthi chungchangah state sorkar leh chhungkaw member aṭanga update a ngaih ṭhin avangin a chak thei lo a, aadhaar tih tawp lamah pawh thil a ti harsa ṭhin niin a sawi.

UIDAI chuan mitthite Aadhaar tih tawpna kawngah hian Registrar General of India(RGI) aṭanga mitthi chhinchiahte aṭanga data hi hman a nih ṭhin thu RTI zawhna chhannaah hian an sawi. Thi tawhte Aadhaar tih tawp awlsam taka kalpui a nih theihna tur hian sorkar laipui chuan technical hmanga automatic update a nih theihna tur a buaipui niin a sawi bawk.