CARA-in SARA kaihhruaina thar tur a ti chhuak

Central Adoption Resource Authority(CARA) chuan state tina State Adoption Resource Agencies (SARA) tan kaihhruaina thar a ti chhuak. Adoption center-te chu fa lakna buaipuina pre-adoption, post-adoption stage, leh adoption buaipui mek laia counselling pekna thuam chak turin a hriattir.

Kaihhruaina te hi July 7 khan Juvenile Justice (Care and Protection of Children) Act, 2015-in thuneihna a pek anga tih chhuah niin, hei hi Adoption Regulation, 2022 nen a kalkawpa siam a nih thu Ningania an thuchhuahah an tarlang. CARA hi Ministry of Women and Child Development hnuaia statutory body leh nodal agency anga thawk niin, ramchhung leh pawna Indian naupang adopt chungchang buaipui hna an thawk a ni.

Fa lak chungchanga conselling lama hmalakna thar tura tih hi fa lakte, fa la tute, leh an fa lak tura petu chhungten psychosocial support ṭha tak an neih theihna tur atana ruahman a ni. CARA chuan fa lak chungchanga counselling ṭha tak pek chuan rilru inpuahchahna kawngah nasa taka a puih bakah, inthlak danglam awm thei leh hun lo kal zel tur atan naupang leh a enkawltu chhungte tan inbuatsaihna a siam sak thei dawn niin an sawi. State-a adoption board-te pawh counsellor qualified ngei state leh district-ah te chhawr turin a hriattir tawh bawk.