India-in defence thuam chakna lam pan zel

India chuan tun hnaia Pakistan nena an inbeihna a thlen hmaa a lo ruahman tawh, defence huang thuam chakna tur hrang hrang a lo siam tawh angin Thawhṭanni khan US aṭangin GE-F404 engine a lei belh. US aṭang vek hian hun rei tak chhung a lo nghah tawh, Apache attack helicopter chu July 21 hian an inhlan dawn bawk a ni.

Senior defence official chuan US aṭanga fighter engine thar lei tih thlenna tur chu public sector Hindustan Aeronautics Limited (HAL) ten an buaipui dawn tih a sawi. Kumin sorkar kum chhung ngei hian GE F404 engine dang 12 pawh tih thlen leh tum a nih thu a tarlang. Engine thar hi LCA Mark 1A fighter jet-ah pawh hman theih a ni ang.

HAL chuan kum 2021 August khan Rs vbc 5,375 hu F404 engine 99 leh GE Aerospace chu India siam Tejas Mk-1A thuam chakna turin an chah fel tawh bawk. GE-F404 engine pakhat chu March-ah khan HAL hian an lo dawng tawh a, hei bakah hian 'tanks in the air' an tih mai AH-64Es helicopter chu Indian Air Force(IAF) Hindon Aiforce Station-ah a rawn thleng dawn bawk.

IAF chuan tun hmain Apache 22 chu US nen a inremna hnuaiah leh Boeing nena thawh dunna in 2015 khan a lo nei tawh a, tuna Apache helicopter lei thar tur hi president Donald Trump -a term hmasa zawk daih tawha Apache paruk leina turin inremna an siam tawh hnuai a mi a ni.