
Inthlan hmabak Bihar-ah in thahna pung
State assembly inthlan hmabak Bihar-ah chuan tun hnaiah in thahna a thleng nasa hle. Thah zingah hian sumdawng, politician, dan hremi, zirtirtu te pawh an tel. Hetianga in thahna a pun chhoh chhan hi dan loa silai leh a mu lei mai theiha a awm vang nia sawi a ni. Police-te chu dan loa ralthuam lei theih awm lakah thupek an kengkawh ṭha lo nia sawi a ni bawk.
Tun hnai ni 10 liam ta chhung khan sumdawng Gopal Khemka, BJP leader Surendra Kumar, dawr nghaktu, zirtirtu leh hmeichia kum 60 te chu thah an ni.
State Crime Record Bureau (SCRB)-in a tarlan danin January aṭanga June inkarah khan inthahna vawi 1,376 thleng tawhin chawhruala thla tin mi 229 thah ṭhin anga chhut a ni. National Crime Records Bureau (NCRB)-ah Bihar hi silai hmanga inbeihna thlen tamna state zingah a lang pha a ni. Pawikhawihna thlen tam lamah hian 2017, 2018, 2020, leh 2022 te khan pahnihna a lo ni tawh bawk.
National Database of Arms Licenses-Arms License Issuance System (NDAL-ALIS) portal-a tarlan a nih danin, Bihar-ah hian silai kawl 82,326 awmin, active arms license 77,479 a awm. Silai zawrh phalna nei hi 141 an awm laiin, an zinga 114 chauhin an zuar a, 27 te chuan an zuar chhuak lo thung.
DGP Vinay Kumar chuan,"Ram inchuhna leh bungrua in chuhnate chu heng inthahna thlen tam chhan a ni. Heng thil thleng ṭhinah hian chhui chhuah kawnga force te chu 100% in an hlawhtling ṭhin" tiin, nikum aiin pawikhawihna thleng a tlahniam tih a sawi bawk.
Bihar-ah hian Patna chu Arms Act kaihhnawih thubuai tamna ber district niin, chawhrualin kumtin thubuai 321.7 awm anga chhut a ni a, silai hmanga pawikhawihna hi ṭum 82 thleng ziah anga chhut a ni bawk. Motihari, Saran, Gaya, Murzaffarpur leh Vaishali ten an dawt a, mahse henga pawikhawihna thlenga silai an hmante hi phalna neite siam chhuah a ni. Bhojpur chu a mipui cheng zat aṭanga teha silai leh license pek chhuah tamna ber a ni thung a, mi nuai khatah silai 205 leh license nei 196 zel awm ang an ni.